CEBU CITY — Gimando na sa City Government nga pa-isplikaron ang Kapitan sa Basak Nicolas nga si Norman Navarro ug mga opisyal niini sulod sa 24 ka oras subay sa kalapasan niini sa guidelines ubos sa Enhanced Community Quarantine (ECQ) status.
Kini subay na usab sa nahitabong prusisyon ug pagpahigayon og sinulog sa Sitio ALumnus sa naasoy nga barangay bisan paman og gidili ang mass gathering.
Gimandoan na ni Cebu City Mayor Edgardo Labella ang city legal office pinaagi ni City Attorney Rey Gealon nga maoy mu-imbestigar niini.
Nasayran nga gi-isyuhan na ang kapitan og show cause order ingon man ang Sangguniang Pambarangay members kalabot sa maong pangitabo.
‘Tubagon na lang sa proper forum’
Tubagon nalang matud pa sa ‘proper forum’ sa organizer sa nahitabong Sinulog sa Barangay Basak San Nicolas ang iyang habig human nga gipahigayon niini ang prusisyon bisan paman og gidili ang mass gathering.
Kini human usab nga gihimakak ni Basak San Nicolas Kapitan Normam Navarro nga mitugot kini sa maong aktibidad.
Read more: Giingong prusisyon atol sa fiesta sa Basak San Nicolas sa Cebu City, giimbestigaran na
Sa dihang subling gibisita sa Bombo Newsteam ang naasoy nga barangay aron sa pagkuha sa habig sa organizer ingon man sa mga misalmot sa prusisyon, wala nakini nagpahinabi sa kahanginan sanglit gipaubos naman kini sila sa imbestigasyon sa CIDG.
Matud pa usab sa ubang misalmot nga, bisan ug sila nagpasundayag, nag-obserbar matud pa sila og social distancing ug ang nagkuha lang matud pa og hulagway ug ang nagpakatap niini sa social media ang nagpadako sa issue.
Dugang pa niini, wala matud pa naabtan og 10 minutos ang ilang pagpahigayon sa sinulog sa Sitio Alumnus.
Sa lahing bahin, miingon si Major General Melquiades Feliciano, ang deputy implementor sa IATF sa Visayas, nga responsibilidad sa kapitan ang pagpatuman sa mga lagda subay na sa enhanced community quarantine.
Dason pa sa heneral nga angayang manubag ang kapitan kung mapamatud-an nga duna kini kalapasan sa pagpahigayon og prusisyon sa naasoy nga sitio agi ug kasaulugan sa kapiyestahan sa ilang patron.
