Gimanduan ang usa ka cash clerk sa Mandaue City Treasurer’s Office nga i-dismiss sa serbisyo human siya mapamatud-ang sad-an sa grave misconduct, gross neglect of duty, serious dishonesty, ug conduct prejudicial to the best interest of service.
Kini gumikan sa iyang kapakyas sa pag-remit sa P3,342,255.70 nga koleksyon sa buhis ug sa iyang pagdumili sa pag-account sa nawala nga pundo.
Gikompirmar usab ni City Administrator Atty. Gonzalo Malig-on, nga ang maong empleyado gi-terminate tungod sa rekomendasyon sa City Legal Office ug sa pagtugot ni Mayor Thadeo Jovito “Jonkie” Ouano.
Matod ni Malig-on, sa internal nga imbestigasyon nasayran nga ang clerk unang napakyas sa pag-remit og ?21,000 niadtong Pebrero 2024, ug nausban kini sa kapakyas sa pag-remit og ?3 milyones niadtong Abril 2025.
Gihatagan usab kini sa City Legal Office og higayon sa pagpasabot sa iyang habig, apan human sa due process, girekomendar sa buhatan ang pagpataktak kaniya epektibo niadtong Oktubre 13, 2025, matod ni Malig-on.
Gawas sa termination, gitun-an usab sa City Legal Office ang posibilidad nga mapasakaan og kasong kriminal ang empleyado tungod sa gross misconduct ug serious dishonesty.
Si Mayor Ouano niingon nga ang maong aksyon nagsilbi nga pahimangno sa ubang mga empleyado sa City Hall nga dili magbuhat og dili matinud-anon nga mga buhat.
Samtang, matud usab ni Malig-on nga ubay-ubay pang mga empleyado, partikular na sa City Treasurer’s Office, ang posibleng mag-atubang og imbestigasyon tungod sa giingong mga iregularidad nga naglambigit sa pundo sa siyudad.
