CEBU CITY-Doble ang pagpangandam nga gibuhat sa mga sakop sa Cebu City Police Office (CCPO) aron masiguro ang kahapsay sa dakbayan karong Semana Santa ug minos usa ka buwan sa umaabot nga piniliay.
Kon diin personal nga gisusi mismo ni CCPO Acting City Director Police Col. Enrico Figueroa ang mga sakop niini sa gipahigayong panagtapok nila sa Cebu City Sports Center niadtong Biyernes, Abril 11, 2025.
Ang maong kalihokan kay nagtumong sa pagpatin-aw sa ilang pagpangandam ug hingpit nga tanang personahe sa CCPo kay kumpleto sa kahimanan alang sa ilang mga police operations.
Nahisubay kini sa kamanduan ni Police Brigadier Gen. Redrico Maranan, ang Regional Director sa Police Regional Office – Central Visayas (PRO-7) isip pagpangandam sa dakbayan alang sa mga dagkong aktibidad karong Semana Santa ug umaabot eleksyon.
Miabot sa 1,400 ka mga police ang gi-inspeksyonan sa ilang mga gamit lakip na ang ATM cards ug PNP IDs niini ug pagsusi sa ilang mga armas sa 1,317 short firearms ug 830 long firearms sa pagisugro nga anaa kini sa maayong kondisyon.
