Gidagsa sa mga tawo nga nawad-an og cellphone ang headquarters sa Cebu City Police Office (CCPO) sa pamasin nga marekober ang ilang mga gadgets human sa raid operation sa kapulisan sa tindahan sa dalan Leon Kilat, Barangay Pahina Central ning dakbayan sa Sugbo niadtong Martes sa hapon, Enero 20, 2026.
Matod pa sa kapulisan sa dakbayan nga sa kinatibuk-an nakasakmit sila sa 154 ka mga mobile phones nga kasagaran mga Apple products sa modelong “iPhone” gikan sa raid operation nila sa 2nd floor sa Aljam Cellphone Accessories shop nga gikatahong sa kataas sa kasaulogan sa kapistahan sa Sinulog nangawala sa mga tag-iya o sa wala pa ang buwan sa Enero ning tuiga sa pagdudang gipangkawat kini.
Gani sa eksklusibong pakighinabi sa Bombo Radyo Cebu News Team kang Police LtCol. Jose Los Baños, ang tigpamaba sa CCPO nga gilatid niini nga ongoing ang ilang imbestigasyon sa maong na-raid nga pamatigayon ug sa mga konektadong indibidwal niini.
Gidudahan sa mga awtoridad nga ang mga abilidad sa mga suspek sa pag-access ug pag-unlock sa maong mga gadget kay nakatampo sa ilang pagpanghipos sa mga gidudahang kinawat nga mga cellphone nga gipaubos og recovery aron malukat sa mga tinuod nga tag-iya.
Sa mga ebidensya nahipos, naghikay ang kapulisan sa pagpasaka sa reklamong kriminal batok sa mga suspek sa kalapasan sa PD No. 1612 (Anti-Fencing Law) kinsa nagsilot sa mga adunay posesyon sa mga kinawat nga mga gamit.
Ingon man nga sa recovery efforts sa kapulisan, anaa na sa kapin 53 ang nakumpirmar nga mga gadgets ngadto sa ilahang mga tag-iya diin giawhag niini ang ubang mga nawad-an nga mubisita sa Camp Sotero Cabahug sa CCPO aron makapasaka og pormal nga reklamo sa mga suspek ug mabawi ilang gamit. Dugang pa nga namalihug kini sa pagdala og charger ug balidong ID aron maproseso ang pagpanumbalik sa ilang mga cellphone.
