Hingpit nang epektibo ang ceasefire tali sa Israel ug Lebanon gahapong adlawa, Abril 17, diin gilaoman niini nga matuldokan ang 6 ka semana nga gubat tali sa Israel ug sa armadong grupo sa Lebanon nga Hezbollah.
Bisan pa sa pagsugod sa ceasefire sa sayong buntag gahapon, ang Hezbollah nagpadayon sa pagpabuto og mga rocket sa amihanang Israel, samtang ang mga pag-atake sa Israel gikataho nga nagpadayon tunga sa oras human nagsugod ang ceasefire.
Sa laing bahin, ang Israel miinsister nga ang mga tropa niini magpabilin sa mga lugar nga giokupar niini sa habagatang Lebanon, samtang ang pipila ka mga Lebanese nagsugod na usab sa pagbalik sa habagatang Lebanon, nga mao ang sentro sa mga pag-atake sa Israel ug gituohan nga usa ka kuta ug usa ka dako nga presensya sa Hezbollah.
Samtang, ang pipila ka mga lungsuranon sa lain-laing mga bahin sa Lebanon nagsaulog sa mga kadalanan human nagsugod ang ceasefire.
Giabiabi sa Iran ang 10 ka adlaw nga ceasefire apan, nanawagan alang sa hingpit nga pag-atras sa mga tropa sa Israel gikan sa Lebanon.
Subay niini, si Presidente Donald Trump sa US malaumon nga ang usa ka kasabutan aron tapuson ang gubat sa Iran makab-ot pagkahuman sa kasabutan sa ceasefire tali sa Israel ug Lebanon. Kini nahitabo taliwala sa gilauman nga pagpadayon sa mga negosasyon karong hinapos sa semana.
