CEBU CITY-Gipasiugda ni Cebu Archbishop Jose S. Palma ang pagbalik-lantaw sa tuig 2024 bisan pa sa mga pagsuway ug kalisdanan, kay daghan gihapon kita og rason nga magpasalamat.
Mao kini ang iyang unang pamahayag sa pagsugod sa iyang wali atol sa bisperas sa bag-ong tuig diin gisalmutan sa liboan ka mga Sugboanon ug mga turista.
Matud sa Arsobispo nga sa atong pagtungtong sa tuig 2025, ug kalabot sa Solemnity of Mary, Mother of God nga gisaulog matag Enero 1, kay angayan lang nato nga ibutang ang atong pagsalig kang Hesus ug Maria kay bisag unsay mahitabo, dili gayud sila mobiya alang sa atong kaayuhan.
Gidugang usab niini nga inahan sa Diyos si Mama Mary apan, sa atong kasingkasing, inahan usab siya natong tanan.
Gumikan sa walay pagduhaduha, nabati nato ang gugma ni Maria isip iyang mga anak.
Hinungdan nga gidasig sa Arsobispo ang katawhan nga mamahimong malaumon ning biyahe sa kinabuhi.
