Dili mohunong ang progresibong grupo sama sa bagong Alyansang Makabayan Central Visayas sa pagpahigayon og mga lihok-protesta matag Biyernes diin nagsugod na sila gahapon ug gitawag nila kini nga Cebu Black Friday Protest.
Kini ang gipadayag ni Jaime Paglinawan, ang Chairman sa Bayan Central Visayas atol sa pakighinabi sa Bombo Newsteam nga ang tumong sa ilang protesta kay ipakita ang ilang namatikdan nga giingong walay klaro ang gihimo nga imbistigasyon sa Independent Commission for Infrastructure tungod kay hangtud karon wala pa’y napriso ug wala pa nahibalik ang kwarta sa katawhan nga gikawat sa mga mapahimulos nga politiko sa nasud.
Sa pagsugod sa Black Friday Protest Against Corruption and Repression nagmartsa ang mga nagprotesta gikan sa Plaza Independencia paingon sa buhatan sa Department of Public Works and Highways (DPWH) sa dakbayan sa Sugbo aron sawayon ang gihulagway nilang kaylap nga impunity sa mga kurakot nga politiko ug sa ilang mga kaalyado sa gobyerno.
Ingon man nga kabahin kini sa nasudnong aksyon nga supak sa bag-o lang naaprobahan nga 2026 National Budget, nga ilang gisaway tungod sa wala maprograma nga mga appropriations, pork barrel allocation, ug confidential and intelligence funds (CIF).
Busa, gihimug-atan niini nga kinahanglan gayud nga adunay manubag sa grabe nga kinawatay sa mga kadagkuan ug pakigkunsabo sa mga kontruktor nga ipaagi sa mga flood control project.
Gipaabot usab nila nga padayon ang ilang panawagan ug pakigbisog sa kadalanan bisan paman sa kainit, uwan, ug halos wala na’y tingog aron lang ipaabot sa gobyerno nga nagpaabot ang katawhan sa hustisya nga ilang gipasalig sa unang pagbuto sa isyu.
