CEBU CITY- Gipahibalo sa Kagamhanang Lalawigan sa Sugbo nga makapasalig sila sa libreng medical school sa mga tinun-an Cebu Normal University College of Medicine – Vicente Sotto Memorial Medical Center (CNU-VSMMC) pinaagi sa scholarship program niini.
Kini ang gianunsyo sa mga kadagkuan sa Kapitolyo ug CNU-VSMMC sa ilang gipahigayong press conference niadtong Miyerkules, Pebrero 18, 2026.
Sumala pa sa gilagdaang kasabutan, ang Kapitolyo maoy mutagana og pundo para sa tuition fee sa mga tinun-an nga mukantidad sa dili muminos P74,000. Pagakuhaon kini nga pundo sa educational fund ubos sa Office of the Governor.
Gisaysay ni CNU President Dr. Laurence Garcia nga ilang siguradohon nga takus ang mga benepisyaryong-iskolar nga makakuha sa maong scholarship sa ilang upat ka tuig nga pagtuon.
Samtang namahayag sab ni CNU-VSMMC Dean Dr. Jarungchai Sato Vatanagul nga abli ang ilang institusyon sa mga nangandoy makapanghimulos sa programa.
Lakip sa mga rekisitos kay ang mosunod:
- Bachelor’s Degree
- General Weighted Average
- National Medical Admission Test (NMAT)
- Entrance Examination
- Interview
- Reported income sa ginikanan
- ug Residency sa probinsya
Giangkon sab niini nga adunay clauses ang maong scholarship program diin sa matag tuig nga nagastuhan sa Kapitolyo ang estudyante kay mutampo kini ug duha ka tuig sa pagserbisyo sa mga tambalalan sa probinsya isip sukli sa pamuhunan sa probinsya sa pagpalambo sa serbisyong medikal ug pagtubag sa kakuwang sa pampublikong institusyon nga nagdalit og libreng medical school sa mga kabatan-onan.
