CEBU CITY-Mipahimangno ang konseho sa kagamhanang dabayan sa Sugbo sa mga empleyado niini sulod sa Cebu City Hall nga magpabiling politically neutral ug likayan ang bisa’g unsang matang sa electioneering o partisan political activities.
Kini maoy unod sa naabprobahan nga resolution nga gisumiter ni Cebu City Councilor Edgardo “Jaypee” Labella II sa nahitabong regular session sa konseho niadtong Miyerkules, Abril 2, 2025.
Gipasiugda niini ang nakalatid sa batakang balaod alang sa political neutrality sa mga trabahante sa gobyerno subay sa 1987 PH Constitution, Local Government Code of 1991, ug sa Code of Conduct for Public Officials and Employees.
Gani daan ngang mipahimano ang Civil Service Commission – Central Visayas (CSC-7) sa maong direktiba sa pagpatuman sa polisiya.
Samtang sa pikas bahin pinaagi sa eksklusibong pakighinabi sa Bombo Radyo Cebu kay Atty. Francisco Pobe Jr., ang Regional Director sa Commission on Elections – Central Visayas (Comelec-7) nga matod pa adunay kagawasan lang sa pagbotar ang mga empleyado lakip na ang mga Casual, Job Order, Co-terminus, ug mga Barangay Workers kay gidid-an mangampanya ilabi na panahon sa trabaho.
Gipahinumdoman sa konseho sa dakbayan nga ang mga paglapas niini nga mga lagda adunay bug-at nga silot, lakip ang pagsuspinde sa mga unang higayon nga nakasala ug posible nga matangtang sa serbisyo alang sa balik-balik nga paglapas.
