Paimbestigaran sa buhatan sa Cebu City Department of Veterinary Medicine and Fisheries (DVMF) ang panghitabong pagkamatay sa sobra 20 ka mga binuhing iro ug iring nga sakay sa usa ka passenger vessel padulong sa Sugbo nga gikan sa Batangas ug Iloilo.
Kini ang gikompirmar ni Dr. Alice Utlang, ang pangu sa DVMF sa pakighinabi niini sa Bombo Radyo Cebu Newsteam diin anaa sa 23 ka mga binuhing hayop (7 ka mga iring ug 16 ka mga iro) ang namatay sa inter-island sea trip nga gipanglantawan nga heat stroke ang posibling gikamatyan sa mga hayop.
Nasayran nga ang maong mga hayop kay gisakay sa maong brako sa enclosed compartment niini.
Matod ni Dr. Utlang nga exposure sa high temperatures sa taas nga panahon atol sa paglawig sa barko ang tinubdan sa heat stroke sa mga hayop.
Samtang ang mga awtoridad kay nagsusi na sa posibling mga lagda sa baload nga nalapas sa mga hingtungdan nga may kalabot sa animal welfare laws ug transport protocols.
Gani matod pa ni Dr. Utlang nga ang saktong proseso sa pag-transport sa mga hayop kay dapat ulahi kining isakay sa barko dayon ig diskarga kay mao sab ang unang ihabwa nga anaa sab dapat sa hayahay nga kahimtang.
Ubos sa Republic Act 8485 o ang Animal Welfare Act ug giamendar sa RA 10631, ang mga registered nga mga animal transporters lamang ang awtorisadong mga sakay sa mga binuhing hayop.
