CEBU CITY-Na-desisyonan sa Cebu City government nga tulo lang ka lungsod ang hatagan sa hinabang — ang Magsaysay sakop sa Davao del Sur, Makilala North Cotabato ug ang Tolonan North Cotabato nga maoy hilabihang apektado sa nahitabong linog sa Mindanao area.
Kini ang gibutyag ni Cebu City Councilor Dave Tumulak, ang chairman sa Committe on Public Order and Safety.
Gikatakda nga karong adlawa dad-on ang mga hinabang nga relief goods ngadto sa nahisgutang lugar kung diin madawat kini sa mga katawhan sa adlaw nga Sabado.Mukuyog usab sa paghatod sa mga hinabang ang pipila ka mga department heads ingon man si Cebu City Mayor Edgardo Labella.
Dugang pa ni Tumulak nga usa sa ilang nahisgutan sa panagpulong kagahapong adlawa ang pag-una lang sa paghatod niining mga relief goods gumikan kay mao kini ang nag-una nga panginahanglan sa mga biktima.
Samtang dunay isunod nga 10 milyones pesos nga hinabang ang city goverment apan isunod lang kini gumikan sa proseso.// Hinuon daghan na nga mga LGU’s ang nihatag usab ug mga hinabang./
‘P10-M inisyal lang nga tabang’
Inisyal nga hinabang palang matud pa ang P10-M alang sa mga biktima sa linog sa Mindanao ug posible nga mapon-an pa kini depende sa assessment sa mga Department Heads nga gipadala ngadto sa area nga giigo sa linog sa Mindanao.
Kini ang gibutyag ni Cebu City Councilor Raymond Garcia atol sa pakighinabi sa Bombo Radyo Cebu. Matud ni Garcia nga dili gyud madali-dali ang pagpagawas sa P10-M hinungdan nga ang ilang pagabuhaton sa pagkakaron mo-hangyo usa sila sa mga kompanya nga mokuha sila daan ug mga relief goods ug isunod ra ang bayad niini.
Sigon pa nga si Cebu City Mayor Edgardo Labella mismo ang personal nga motunol sa mga hinabang ngadto sa Mindanao. (Lahvi Quiñones)
