Gianunsyo ni Cebu City Mayor Nestor Archival Sr. nga ang Kagamhanang Dakbayan sa Sugbo kay gipaubos sa Heightened State of Economic and Operational Preparedness nunot sa nagpadayong kagubot sa Middle East nga makaapekto sa presyo sa produktong lana.
Sa public advisory nga gipost sa mayor nga mipahibalo kini sa pga Sugboanon sa posibleng hait nga pagsaka sa presyo sa produktong lana sa muaabot nga mga semana nga hilabihang makaapektar sa sektor sa transportasyon, presyo sa pagkaon, ug ubang pang mga batakang panginanghalon.
Ubos sa maong direktiba, tanang departamento sa City Hall kay gimandoan sa pagpatuman og striktong pagdumala sa ilang konsumo sa gasoline diin ang mga government vehicles kay gamiton nga efficient ug sa mga essential purposes lang.
Gihimug-atan sa mayor ang importansya sa pagpanalipod sa saktong paggasto sa pundo sa kagamhanan ilabi na sa panahon nga wala kasiguraduhan ang kahimtang sa ekonomiya.
Nangandam na sab ang kagamhanang sa posibleng pagsaka sa gasto sa waste management system diin matag tuig naggahin kini og P500-milyones para sa garbage disposal apan tungod sa sitwasyon nga ang waste disposal operations kay ihatod ngadto sa Aloguinsan kay gilauman na ang pagsaka sa hauling ug fuel expenses.
Mipahimangno sab si Mayor Archival sa posibilidad sa pagsaka sa presyo sa pagkaon nga mugna sa nagkataaas nga fuel cost nga nakaapektar sa market supply chain.
Giawhang niini ang mga tigbalay nga mananom og utanon sa ilang mga tugkaran aron makatampo sa pagpaminus sa gastohon sa balay.
Isip kabahin sa resilience measures sa syudad, ang mga residente kay gipahimangnoan sab sa pagkonserbar sa kuryente ug tubig aron sa pagdaginot sa suplay sa dakbayan.
