CEBU CITY– Nangayo og despensa ang Cebu City Health Department (CCHD) gumikan sa matud pa ‘clerical error’ sa ilang gi-release nga certificate of clinical recovery sa usa ka COVID-19 patient.
Sa gipagawas nga statement sa CCHD, nangayo kini og despensa sa publiko ilabina na sa pamilya sa 72 anyos nga nagpositibo sa COVID-19 ug namatay niadtong Mayo 28.
Gipadayag ni Dr. Daisy Villa, ang City Health Officer, nga siguraduhon nila nga dili na masubli pa ang nahitabo nga gikonsiderar nila karon nga ‘isolated case‘.
Matud niini nga adunay sistema ug mekanismo nga gihimo ang opisina aron malikayan ang susamang panghitabo.
Ang naasoy nga namatay nga 72 anyos nga lalaki ang gikan sa Barangay Kamputhaw, dakbayan sa Sugbo kinsang gidala sa tambalanan human nga nakasinati og mga sintomas sa COVID-19 niadtong Mayo, apan nakabsan kini sa iyang kinabuhi niadtong Mayo 28.
Kalabot sa panghitabo, nag-post sa social media ang pamilya sa naasoy nga pasyente sa matud pa sayop sa City government sa dihang ilang nadawat ang certificate nga ang nakasuwat nakarekober ang ilang kabanay ug na discharged na bisan ug kini namatay.
Subling nangayo og pasaylo si Dr. Villa sa maong insidente ug gi-angkon ang responsibilidad sa sayop nga impormasyon. | SBR
