CEBU CITY-Padayon pa ang gilusad nga imbestigasyon nga gihimo sa Cebu City Police Office (CCPO) kalabot sa insidenteng pagpamusil sa usa ka babaye nga sakay og motorcycle-for-hire sa Cebu Business Park ning dakbayan sa Sugbo niadtong Lunes, Abril 14, 2025.
Sa eksklusibong pakighinabi sa Bombo Radyo Cebu Newsteam kang Police Lt Col Maria Theresa Macatangay, ang tigpamaba sa CCPO nga matod pa niini nga ila nang gipalawman ang ilang imbestigasyon lakip na ang backtracking, CCTV monitoring, ug pagsusi sa balay gipuy-an sa biktima diin ang point of origin sa iyang gi-book nga motorcyle-for-hire.
Gani aduna nay pipila ka mga angulo ang mga kapulisan sa maong insidente sa pagpamusil lakip na ang modus operandi nga gitulis kini apan walay kabutangan sa biktima ang nawala kaniya.
Gani ang Mabolo Police Station ug Theft and Robbery Sect sa CCPO ang nangulo sa maong kaso aron masulbad kini.
Samtang ang biktimang babaye kay daling nadagan sa pinakadoul ng tambalanan aron masalbar ug mahatagan og tukmang atensyong medical.
