CEBU CITY-Gitataw ni Gov. Gwendolyn Garcia nga ang mga trabahante sa supermarkets sa Cebu City nga nagpuyo sa probinsya ang iyang papuy-on nalang dinhi sa dakbayan.
Kini human nga mapatuman ang ‘Enhanced Community Quarantine’ sa Cebu Province.
Gipasabot usab sa gobernadora nga mao nga boot niya nga papuy-on nalang sa dakbayan ang mga nagtrabaho sa supermarkets gumikan kay sa tanang sektor, ang supermarkets lang ang mi-abli ug ang mao’y labing nakaginansiya.
Nagtoo ang gobernadora nga makasuporta gyud ang mga tag-iya sa mga supermarkets sa ilang mga empleyado ug angayan nga ipahimutang gyud kini nila og tarong. Kung kini matud pa ang magsige og gawas ug sulod sa borders mamahimo pa kining risgo sa covid-19 o carrier sa virus.
Gani, gi-awhag pa sa gobernadora ang mga dagkong negosyante nga mutabang usab sa mas nanginahanglan ug tagaan og saktong ayuda ang ilang empleyado, ug tipakan lang ang ilang dagko nga ginansya.
