Makadawat og mas dako nga cash incentives gikan sa Cebu City Government ang mga Sugbuanong atleta nga nakakuha og medalya atol sa ilang pagsalmot sa 30th Southeast Asian Games.
Atol sa ilang courtesy call, mipahibalo si Cebu City Mayor Edgardo Labella nga mas gipadako na ang ihatag nga cash alang sa mga atleta nga nakakuha og gold, silver, ug bronze medals.
Makadawat og P300,000 ang nakakuha og gold medal, P200,000 usab alang sa mga silver medalists, ug P100,000 usab alang sa mga nakaangkon og bronze medals.
Matud ni Labella nga angayang saluduhan ang mga atleta nga naningkamot pinaagi sa maong insentibo ug dili lang kutob sa pagpamakpak lang.
Tungod niini, gimanduan ni Labella ang City Council nga ipasar ang resolusyon kalabot na sa cash incentives sa mga atletang nakadaug sa SEA Games.
Giila sa Cebu City Government ang kadaugan sa mga atleta sa nakalabay nga biennial regional sports meet sama sa skateboarding champion nga si Margielyn Didal, marathoner nga si Mary Joy Tabal, ug dancesport champions nga silang Wilbert Aunzo ug Pearl Marie Cañeda.
Samtang napaglantawan usab ni Labella nga tungod sa kadaugan sa mga pambato sa Sugbo sa SEA Games, ilang palambuon ang sports programs sa dakbayan.
Subay niini, gimanduan sa mayor ang konseho nga magtukod og mga sports development programs alang sa mga future athletes sa Sugbo.
