CENTRAL VISAYAS-Giingong makasinati og 14 porsyento ang Central Visayas sa pagkunhod sa kinatibuk-ang ekonomiya, nga mokabat sa gibana-bana nga P179 bilyon, tungod sa pagbuwag sa Negros Oriental ug Siquijor gikan sa rehiyon nunot sa pagpatuman sa Negros Island Region (NIR) law.
Matud ni Engr. Felixberto Sato Jr., supervising statistical specialist sa Philippine Statistics Authority Central Visayas (PSA 7), diin gitataw niini nga ang Negros Oriental nakatampo og 12.9 porsiyento ug Siquijor 0.9 porsiyento sa kinatibuk-ang ekonomiya sa Central Visayas.
Bisan pa sa maong adjustment, si Sato mipadayag og pagsalig nga ang Central Visayas magpabilin sa iyang status isip “trillionaire” nga ekonomiya, usa ka milestone nga nakab-ot niini matag tuig sukad niadtong 2016.
Ang pagmugna sa NIR nagtumong sa pagpahapsay sa mga paningkamot sa pagdumala ug kalamboan alang sa Negros Oriental ug Siquijor.
Gidugang pa ni Sato nga ang Probinsiya sa Sugbo nagpabilin nga labing dako nga kontribusyon sa ekonomiya sa tanang highly urbanized nga mga siyudad ug probinsiya sa Central Visayas, nga nagkantidad og 30.1 porsyento sa kinatibuk-an.
Namatikdan usab niini nga sa Negros Oriental, ang sektor sa serbisyo nagduso sa ekonomiya, diin gisundan sa agrikultura, samtang ang pag-uswag sa ekonomiya sa Sugbo nag-una sa manufacturing industry.
Samtang ang Bohol nakatampo og 13.3 porsiyento sa Gross Regional Domestic Product (GRDP) sulod sa tulo ka highly urbanized nga mga siyudad sa rehiyon, diin ang Cebu City nakatampo og 22.4 porsiyento, Lapu-Lapu City 11.8 porsiyento, ug Mandaue City adunay tampo nga 8.5 porsiyento.
Sukwahi sa Central Visayas, ang Kasadpang Kabisay-an, nga nakab-ot sa trilyonaryo nga status sa unang higayon niadtong 2023, mahimong mag-atubang ug dakong pag-us-os sa ekonomiya.
