Gipabakwit sa mga lokal nga kagamhanan ang mga residente nga nagpuyo duol sa usa ka suba sa kabukirang bahin sa San Remigio ug dakbayan sa Bogo, human nga nidahili ang yuta nunot sa pagtay-og sa kusog nga linog niadtong Setyembre 30 nga nagmugna og artificial dam nga karon nagatag og hulga nga mo-awas.
Nasayran nga ang mga apektadong residente naglakip sa nagpuyo gikan sa tulo ka barangay sa San Remegio nga mao ang Tigib, Gawaygaway ug Tacup.
Basi sa pamahayag ni Liza Socorro Juanico Manzano, geologist ug kanhi hepe sa Mines and Geosciences Bureau’s Lands Geological Survey Division nga ang maong panghitabo usa ka artificial damming nga naghatag og seryoso nga risgo sanglit ang tubig nga na-trap mahimong motuhop ilawom sa yuta ug posibleng makapahuyang sa karst foundation sa naasoy nga lugar ug moresulta sa laing pagkahugno sa yuta o sinkhole.
Subay niini, ang mga opisyal sa San Remigio nangayo og dugang teknikal nga suporta aron luwas nga mabungkag ang obstruction ug masusi ang downstream nga mga komunidad nga mahimong maapektuhan kung ang artipisyal nga dam moawas.
Gikuhaan usab og habig sa Bombo Newsteam si Mayor Mariano Martinez kabahin sa maong kabalaka diin ang buhatan sa DPWH ug mga engineers sa Probinsya sa Sugbo kay nibalibad usab nga magpahigayon og clearings gumikan sa risgo tungod kay padayon paman ang paglihok sa yuta.
Bisan paman nga mao kini ang rekomendasyon apan tungod sa delikado kay dili kini gipugos hinungdan nga padayon gihapon ang ilang pagpangita og mga alternatibong solusyon.
