Nipasalig si Commission on Elections Chairman George Erwin Garcia sa publiko nga imposible nga mahitabo ang ‘dagdag-bawas’ karong umaabot nga piniliay sa Mayo.
Kini nunot sa pamahayag ni VP Sara Duterte nga ang iyang amahan nga si kanhi Presidente Rodrigo Duterte, nipaambit sa iyang kahadlok nga posibleng adunay ‘add-and-drop’ sa eleksyon.
Nitubag dayon si Garcia ug niingon nga sukad niadtong 2010, wala pa’y ebidensiya nga adunay ‘dagdag-bawas’ sa piniliay.
Dugang pa niini nga sa automated elections, adunay daghang paagi aron masusi kung sakto ba ang mga boto nga mosulod sa mga makina gikan sa mga balota.
Usa na niini mao nga makita dayon sa mga watchers ug mga botante ang election returns kay i-post dayon kini sa gawas sa matag presinto.
Diin ang mga hulagway sa balota ipakita usab ngadto sa mga watcher ug citizens arms, ingon man nga ang komisyon mopahigayon usab og random manual audit.
Ug gawas sa hard copy sa mga resulta sa boto ug mga resulta gikan sa mga server nga madawat sa mga citizens arm kay hatagan usab sila sa poll body og QR code nga adunay kinatibuk-ang boto sa matag presinto.
