CEBU CITY — Posibleng mobalik sa pagbiyahe ang mga traditional jeepney sa dakbayan sa Sugbo sa sunod semana o inig human sa paghandum sa kalag-kalag.
Kini ang malipayun nga gibutyag ni Konsehal James Cuenco human nga gi-aprubar na ni Cebu City Edgardo Labella sa rekomendasyon niini sa mga guidelines sa pagpabalik sa operasyon nga mga tradisyunal nga jeepney.
Matud ni Cuenco nga mopahigayon una ang City Government karong Oktubre 30 ang “one stop shop” services sa North Reclamation Area, Cebu City ug tambungan kini sa mga tinugyanan gikan sa City Health, Land Transportation Office (LTO-7), ug sa Land Transportation, Franchising, and Regulatory Board (LTFRB-7).
Sutaon una sa mga tinugyanan kung aduna bay plastic barrier ang sulod, nakapasar ba sa road worthiness test, ug nagnegatibo ba sa COVID-19 test ang driver sa dili pa makabyahe ang mga jeep.
Dugang pa ni Cuenco nga adunay 14 routes sa jeepney ang magdagan sa kadalanan nga maoy mopuno sa transportation sa syudad.
Gitataw niini nga magpabilin gihapon nga modagan ang mga bus hangtud sa subling ablihan ang mga border sa laing probinsya nga orihinal nga rota niiini. (ekp/gn)
