Gipa-Bombo! sa mga lumulupyo sa Vistamar, Barangay Soong 1 sa dakbayan sa Lapu-Lapu ang daw temporary garbage storage area sa kagamhanan sa ilahang dapit tungod sa nangalisbo nga baho niini nga misulod na sa ilang mga panimalay.
Gani gi-ronda sa Bombo Radyo Cebu News Team ang maong dapit diin nasuta ang mga dump trucks nga puno og basura diin midam-ok sa ilang mga karga maong dapit.
Nahinabi sa Bombo Radyo Cebu News Team ang mga lumulupyo duol sa maong dapit diin namulong kini nga maglisod sila sa pagpahuway ug pagpuyo naman lang sa ilang mga panimalay tungod sa puryagaba nga langsi sa basura kada labyog sa hangin.
Gi-kwestiyon sa mga residente kung ngano naka-operate ang maong dam-okanan sa basura sa dihang ang ilang kasayuran kay residential area ang ilang dapit.
Sumala pa nila nga kapila na sila mireklamo kabahin niini apan walay tarong tubag ug aksyon ang nakuha nila.
Gisuway sa Bombo Radyo Cebu News Team og kuha og habig sa kagamhanang dakbayan sa Lapu-Lapu ilabi na kag Mayor Cindi King Chan apan hangtod sa pagkakaron kay wala pay tubag nga midapit kabahin sa maong reklamo.
