Subling gipakita ni kanhi Senador Leila de Lima ang giingong papel ni kanhi Presidente Rodrigo Duterte sa kontrobersyal nga Davao Death Squad.
Atol sa pag-atubang ni De Lima sa Quad Committee sa House of Representatives, si De Lima niingon nga si Duterte mismo ang utok sa mga pagpatay nga gihimo sa mga sakop sa DDS.
Sa pipila ka mga kaso, matod niya, si Duterte mismo ang mopatay sa pipila ka mga indibidwal.
Lakip sa gitumbok ni De Lima mao ang affidavit sa kontrobersyal nga si Edgar Matobato, ang miangkon nga hitman nga giingong usa sa mga orihinal nga miyembro sa DDS.
Dugang ni De Lima, kinsa nagsilbi usab nga Chairperson sa Commission on Human Rights ug secretary sa Department of Justice, dugay na nga nahitabo ang mga pagpamatay nga gihimo sa DDS, sukad nga si Duterte ang chief executive sa Davao City.
Ingon man ang mga gidokumento sa iyang kampo ang giingong upat ka dumping ground diin gilabay ang lawas o patayng lawas sa mga napatay nga biktima.
Naglakip kini sa Laud Gold Cup Quarry, Gaisano, Mandug Mass Grave, ug ang ikaupat kay mao ang tubig nga gitabonan sa Samal Islands.
