Nianhi sa Bogo City, Cebu si Secretary of National Defense Gilberto C. Teodoro, Jr. aron personal nga sutaon ang grabeng kahimtang sa mga naapektuhan sa kusog nga 6.9 magnitude nga linog kagabii.
Kauban sa sekretaryo ang pipila ka dagkong opisyal sa nasud nga sila si Department of Tourism Secretary Christina Frasco, Department of Public Works and Highways Secretary Vince Dizon, ug Department of Social Welfare and Development Secretary Rex Gatchalian.
Samtang gikan pa sa Manila, paingon na usab sa Bogo City ang BRP Teresa Magbanua nga may sakay nga 36 ka mga doktor, nurse ug medical personnel sa Philippine Coast Guard (PCG) aron mopanghatag og hinabang medikal sa mga biktima.
Sa laing bahin, anaa usab karon si Cebu Archbishop Alberto Uy sa Daanbantayan human sa pagkadaut sa simbahan tungod sa linog.
Nanawagan ang Arsobispo sa tanang komunidad sa Sugbo nga mag-usa sa pag-ampo ning panahona sa katalagman ug pagsulay.
Samtang padayon ang gihimong retrieval operations sa Bureau of Fire Protection–Special Rescue Force 7 sa Bogo City aron pagpangita sa mga biktima nga nabilin sa mga naguba nga kabalayan ug establisyemento.
