CEBU CITY-Pagatun-an pa sa kagamhanang dakbayan sa Sugbo ang pormal nga deklarasyon niini og Public Health Emergency nunot sa ihap sa mga nataptan nga sakit sa dengue sa syudad.
Kini ang gipamahayag ni Cebu City Mayor Raymond Alvin Garcia atol sa pakighinabi niini sa mga sakop sa tigbalita sa Cebu City Hall adlaw sa Lunes, Marso 10, 2025.
Matod sa Mayor nga wala pay igong basehan ang iyang buhatan aron sa pagdeklarar sa maong emerhensiya sa panglawas subay sa rekomendasyon sa mga laing departmento sa kagamhanan.
Apan wala gikalimod sa opisyal nga adunay pagsaka sa ihap sa nataptan sa sakit sukad niadtong buwan sa Enero karong tuiga.
Kung itandi sa samang panahon sa nakalabayng tuig, miabot sa 93 ka mga kasong natala sa sakit nga dengue sa dakbayan sa buwan sa Enero 2024 samtang 100 ka mga ihap sa sakit sa Pebrero 2024.
Apan karong tuiga miabot kini sa 96 ka mga kaso sa Enero 2025 ug 223 sa Pebrero 2025 sumala pa sa Cebu City Health Department.
Hinuon mipasalig ang kagamhanan nga aduna nay gipanghan-ay nga programa ang syudad aron kapugngan ang pagsaka sa kaso sa sakit nga dengue.
Giawhag sa mga awtoridad ang publiko sa saktong pamatasan sa paglimpyo sa mga dapit pinuy-anan aron mikuhod ang mga oppurtunidad sa mga lamok nga mangitlog ug manganhan nga maoy tinubdan sa maong sakit.
