Nihimo na ang Department of Environment and Natural Resources (DENR) og usa ka composite team nga mopahigayon og imbestigasyon ug fact-finding mission kalabot sa pagdahili sa yuta o landslide sa Binaliw Sanitary Landfill sa Cebu City.
Sumala sa DENR, ang maong composite team pagapamunuan ni Assistant Secretary Norlito Eneran ug gilangkuban sa mga representante gikan sa civil society ug academe, lakip na silang EcoWaste Coalition National Coordinator Aileen Lucero ug Engr. Janice Jamora sa University of San Carlos, aron maseguro ang pagka-patas sa imbestigasyon.
Lakip usab sa grupo ang mga eksperto sa DENR gikan sa Mines and Geosciences Bureau (MGB), Environmental Management Bureau (EMB), ug Legal Affairs Service.
Malangkuban ang ilang imbestigasyon sa engineering ug environmental appraisal sa pasilidad, pagsunod sa Environmental Compliance Certificate (ECC) ug landfill standards, paghimo og rehabilitation plan, pagpangita og alternatibong waste disposal sites, ug ang pagmugna og malungtarong estratehiya sa solid waste management.
Gipasalig usab ni DENR Secretary Raphael Lotilla nga panubagon ang mga responsable ug mosumite ang composite team og report lima ka adlaw human mahuman ang imbestigasyon.
