CENTRAL VISAYAS-Napangandaman sa Department of Education Central Visayas (DepEd-7) ang pipila ka mga tunghaan sa dakbayan sa Sugbo isip paggahin og lugar nga billeting areas sa mga partisipante ug contingents sa Pasigarbo sa Sugbo 2024.
Kini ang giklaro ni DepEd 7 Regional Director Dr Salustiano Jimenez sa pakighinabi niini sa Bombo Newsteam nga walay mga klase sa dakbayan ang naligsan mahitungod na tukma sa long weekend ang paggamit sa mga eskwelahan isip billeting areas.
Mipasalamat sab and director sa kagamhanang probinsya sa Sugbo sa pag-iskedyul sa maong pinaka-ingrandeng cultural event sa Sugbo sa panahon nga dili ipit sa school calendar sa departamento.
Ingon man nga usa sab ka mga tumong sa buhatan sa edukasyon ang pagkamahinungdanon sa cultural-significance sa Pasigarbo isip pagpakli sa kasaysayan sa pagka-Sugbuanon.
Subay niini nga dakong garbo sab sa buhatan ang kalampusan niini sa pipila ka mga dagkong national events nga gipahigayon sa Sugbo sama nalang sa milabay nga Palarong Pambansa ug sa karon nga Pasigarbo sa Sugbo.
Gipasalamatan sa director ang mga magtutudlo sa ilang kaabag sa kamahinungdanaong kalampusan sa matag aktibidad nga agakon sa departamento sa edukasyon.
