Gireport sa Department of Education (DepEd) ang malampusong pagkunhod sa mga papeles ug administratibong buluhaton sa mga magtutudlo sa tibuok nasud.
Sumala ni Education Secretary Sonny Angara, mikunhod og 57% ang mga papeles ug buluhaton sa mga magtutudlo nga may kalabotan sa pagproseso sa mga dokumento, mga trabaho sa opisina, ug uban pang administratibong mga responsibilidad.
Matud pa niya, kini nagtugot sa mga magtutudlo nga mas makatutok sa ilang pangunang tahas nga mao ang pagtudlo sa mga estudyante.
Gipadayag usab ni Angara nga nagpadayon ang DepEd sa pag-hire og mga non-teaching personnel aron maoy modumala sa mga administratibong buluhaton.
Naglakip kini sa hangtod sa 5,000 ka Administrative Officers ug Project Development Officers nga i-assign sa pagbuhat sa mga non-teaching nga mga trabaho nga dugay na nga kabalaka sa mga magtutudlo.
Sumala pa ni Angara, ang tumong sa DepEd mao ang pagpanalipod sa oras sa pagtudlo ug pagtugot sa mga magtutudlo nga makapokus sa ilang trabaho sa sulod sa klasehanan, imbes nga mausik ang ilang oras sa pagdumala sa mga papeles.
Dugang pa niya, kabahin kini sa padayon nga reporma sa DepEd aron mapauswag ang kalidad sa edukasyon ug mapanalipdan ang kaayohan sa mga magtutudlo.
