DFA, gikumpirmar ang usa ka Filipino nga namatay sa Myanmar

Gikompirmar sa Department of Foreign Affairs nga napalgang patay ang usa ka overseas Filipino nga unang gikataho nga nawala human sa magnitude 7.7 nga linog nga miigo sa Myanmar.

Matud ni DFA Undersecretary Eduardo De Vega nga ang biktima mao si Francis Aragon kinsa positibong giila.

Dugang sa ahensya, gipahibalo na sa pamilya sa namatay nga Filipino ang iyang gidangatan ug kahimtang karon.

Una niini, gikompirmar sa igsuon sa biktima ang impormasyon nga nakit-an na ang iyang lawas.

Isip respeto sa pamilya sa namatay, wala na silay laing ipagawas nga impormasyon kalabot sa nahitabo kanila.

Gipasalig sa DFA nga magpadayon ang ilang pagpangita sa mga Filipino nga nawala human sa kusog nga linog.