Hingpit nga gisuportahan sa Department of the Interior and Local Government (DILG) ang pagtudlo kang Presidente Ferdinand Marcos Jr. ngadto kang Criminal and Investigation and Detection Group (CIDG) Director PMaj. Heneral Nicolas Torre III isip bag-ong hepe sa Philippine National Police (PNP).
Sa usa ka pahayag, si DILG Secretary Jonvic Remulla miingon nga ang desisyon sa Presidente resulta sa masusing pagrepaso sa lig-on nga kwalipikasyon ug maayong serbisyo ni Torre.
Matod ni Remulla, masaligon ang DILG nga makahatag og kausaban si Torre ug pakusgan pa ang pagpatuman sa mandato sa PNP ubos sa iyang pamunoan.
Gipaabot usab sa DILG ang ilang pahalipay ngadto kang Torre ug gipasalig nga andam sila nga magtinabangay aron isulong ang mga reporma sulod sa PNP, pakigbatok sa ilegal nga drogas ug kriminalidad, ingon man ang pagpalig-on sa presensya sa kapulisan sa mga komunidad.
Nagpasalamat usab ang DILG kay outgoing PNP Chief PGen. Rommel Francisco Marbil tungod sa iyang maunongon ug maayong serbisyo isip pangu sa nasudnong kapolisan ug gikatakdang moretiro karong Hunyo 7.
Samtang gidayeg ni Speaker Martin Romualdez ang pagkatudlo ni Presidente Marcos kang Torre.
Diin iyang gihulagway si Torre nga usa ka lider nga walay giila nga santos, adunay kaisog, integridad, ug abilidad sa pagpangulo sa kapulisan.
Namatikdan usab sa lider sa Kamara nga bisan pa sa grabe nga pagsusi sa publiko ug pagpit-os sa politika, si Torre lig-on nga nagbarog sa pagpatuman sa balaod samtang gipahigayon ang mga sensitibo ug high profile missions.
Dugang pa niya nga ang lig-on nga liderato ni General Torre sa mga kritikal nga sitwasyon maoy pamatuod nga dili lang siya andam nga molihok, apan iya kining gihimo uban ang pagtahod sa balaod, butang nga talagsaon ug gikinahanglan sa atong kapulisan ning panahona.
Gipasabot usab niya nga seryoso ang administrasyon sa pagpatuman sa mga reporma sulod sa PNP, taliwala sa panawagan alang sa internal cleansing ug modernisasyon.
