MANDAUE CITY- Giklaro ni Dismissed Mandaue City Mayor Jonas Cortes nga dili kini mobalik pagka-miyembro sa Partido Demokratikong Pilipino (PDP) apan gi-endorso lang kini ni kanhi Presidente Rodrigo Duterte.
Kini nunot sa migawas nga hulagway online nga gi-post mismo sa social media account ni Cortes diin giisa ang iyang kamot sa kanhi presidente nga nagsignos sa alyansa sa iyang sakop nga “Team Mandaue” para sa umaabot piniliay karong Mayo 12.
Apan bisan niina, ang kasamtangang kahimtang sa ilang alyansa sa politika kay nagpadayag gihapon sa supporta ngadto sa mga Senatorial Slate sa PDP diin gitumbok niini ng pipila sa ilaha ang nakahatag og kontribusyon ngadto sa mga Mandauehanon ilabi niadtong Congresista pa siya sa karaang Sixto Distrito (6th District).
Dugang ni Cortes nga magpabilin gihapon kining miyembro sa lokal nga partido nga ‘One Cebu’ nga gipangulohan ni Cebu Provincial Governor Gwendolyn Garcia.
Lain gitumbok sa kanhi Mayor nga ang iyang pundok nga Team Mandaue kay panaghiusa sa mga nagkadaiyang politikanhong partido sa ilang dakbayan diin aduna kini mga sakop nga miyembro sa mga partidong nasyonal sama sa Partido Liberal ng Pilipinas ug Aksyon Demokratiko.
