Misaad ang Department of Labor and Employment (DOLE) nga adunay igong trabaho, tabang, ug panginabuhian sa mga trabahante sa Pilipinas nga posibleng mawad-an og panginabuhian tungod sa epekto sa gubat sa Middle East.
Atol sa hearing sa Senate Committee on Foreign Relations and Migrant Workers Committee bahin sa epekto sa gubat, ang chairman sa komitiba nga si Sen. Erwin Tulfo nangutana kon ang DOLE adunay plano kon ang mga negosyo magsira o magtangtang og mga trabahante tungod sa taas nga presyo sa lana.
Mitubag si Labor Undersecretary Carmela Torres nga adunay mga trabaho nga naghulat sa Pilipinas samtang ilang gitan-aw usab ang tanan nga magamit nga mahimong itanyag sa mga trabahante.
Sumala ni Torres, kinahanglan usab nga mahibaw-an ang kategorya sa trabaho nga sudlan sa mga trabahante, sama sa professional, skilled, ug uban pa, aron ang trabaho nga gitanyag kanila ma-adjust.
Miingon siya nga ang livelihood ug emergency employment andam na usab alang sa mga trabahante nga gusto lang og short-term employment.
Dugang niini nga ang DOLE magtanyag usab og skills training aron ipahiangay sila sa mga trabaho nga angay ug gusto nilang sudlan.
Sa dihang gipangutana ang opisyal kon pila ka mga trabahante ang ma-accommodate sa DOLE, iyang gipasalig nga adunay igong trabaho ug panginabuhian nga ikatanyag sa gobyerno sa mga trabahante.
