Mikabat na sa kapin P134 milyones ang nadawat sa Kagamhanan sa Probinsiya sa Sugbo nga donasyon aron suportahan ang hinabang ug rehabilitasyon nga mga paningkamot sa mga komunidad tungod sa 6.9-magnitude nga linog nga miigo sa amihanang Sugbo niadtong Setyembre 30.
Diin ang mga hinabang gikan sa lokal ug internasyonal nga mga donor nga misanong sa panawagan sa probinsya.
Matod sa Provincial Disaster Risk Reduction and Management Office (PDRRMO), niabot sa P134,311,077.27 ang kinatibuk-ang kantidad niadtong Oktubre 17, naglangkob sa P842,053.25 nga cash, P130,023,500 nga tseke, ug P3,445,524.48 sa direct bank transfers.
Nakadawat usab ang probinsiya og P10.5 milyones nga kantidad sa in-kind nga donasyon, katumbas sa 580,037 nga hinabang.
Kini naglakip sa 220,543 ka piraso sa tambal ug supplements, 170,567 ka botelyang tubig nga mainom, 72,172 ka de-lata, 5,661 ka packs sa bugas, ug 4,982 ka ready-to-eat meals.
Gipang-apud-apod na usab sa mga apektadong lungsod ang ubang mga importanteng butang sama sa hygiene kits, sinina, gamit sa panimalay, ug 10 ka generator sets.
Samtang, ang Provincial Veterinary Office nilusad og veterinary recovery framework nga naglakip sa animal rescue, disease control, ug livestock restocking aron matabangan ang mga apektadong mag-uuma nga makabalik sa ilang panginabuhi.
Ang plano naglangkob usab sa pagbansay sa kahayupan nga emerhensya nga pagtubag og rehabilitasyon sa mga naguba nga mga ihawan ug mga puy-anan sa mga hayop.
Gipaambit usab nila nga nakatutok sila sa long-term rehabilitation sa pagtukod pag-usab sa mga eskwelahan, pagpasig-uli sa mga sistema sa tubig, pag-ayo sa guba nga mga taytayan ug mga dalan, ingon man pagpabuhi sa mga operasyon sa agrikultura ug kahayupan.
