CENTRAL LUZON-Gipaniguro sa Department of Social Welfare and Development (DSWD) nga maapod-apod ang mga hinabang ngadto sa mga mananagat nga apektado sa oil spill gikan sa nalunod nga MT Terranova.
Matod ni Assistant Bureau Director for Policy and Administration ug OIC sa Crisis Intervention Division Edwin Morata, ang mga field office niini nangandam na og hinabang alang sa mga biktima.
Apil na niini ang mga field offices sa Central Luzon ug CALABARZON diin gipaabot nga magpadayon ang oil spill.
Dugang pa niini, nga ang maong mga field office nakigkontak na sa mga apektadong LGU’s aron makakuha og listahan sa mga mangingisda nga apektado ug maandam ang gikinahanglang tabang.
Matod sa opisyal, mahimong masuportahan ang mga mananagat pinaagi sa Assistance to Individuals in Crisis Situation (AICS) diin hatagan sila og cash assistance.
Gawas niini, mahimo usab silang benepisyaryo sa Ayuda sa Kapos ang Kita Program o AKAP program nga gihatag sa mga low income workers sama sa mga mangingisda.
Dinhi makadawat ang mga benepisyaryo og cash assistance gikan sa P1,000 ngadto sa P10,000 depende sa assessment sa mga social worker.
Ubay-ubay nga mga LGU ang unang nideklarar og state of calamity tungod sa epekto sa oil spill, nag-una sa Cavite, samtang ang Bataan nagkonsiderar usab sa tibuok probinsya nga deklarasyon tungod sa nagkagrabeng epekto niini.
