Nipasalig ang Department of Social Welfare and Development (DSWD) sa ilang kaandam sa pagtubag sa gikahadlokang mograbe nga sitwasyon sa Bulkang Kanlaon.
Kini dungan sa nagpadayon nga pagbuto sa bulkan, base sa regular nga monitoring sa Philippine Institute of Volcanology and Seismology (Phivolcs).
Suno kay DSWD Secretary Rex Gatchalian, nagpadayon ang produksyon sa 100,000 ka family food packs para sa stockpiling sa bodega sa ahensya nga ginapanag-iyahan sa mga local government units sa Isla sa Negros.
Matod niya nga ang maong stockpile gitumong nga ibutang sa mga strategic areas ug mahuman na kini ugma, Jan. 15, 2025.
Mao kini ang nag-unang tubag sa DSWD sa posibilidad nga mograbe pa ang sitwasyon ug posibleng motaas ang alert level ning bulkan gikan sa kasamtangang Level 3.
Gitataw sa kalihim nga gipalig-on sa DSWD ang ilang ground efforts aron masiguro nga mahatagan ug saktong tabang ang mga apektadong pamilya sa mga evacuation centers.
Sa pinakaulahing datus sa ahensya, kapin sa P76.1 milyones nga balor sa humanitarian aid ang naapod-apod sa mga isla sa Negros sukad nga miulbo na usab ang bulkan niadtong Disyembre sa miaging tuig.
Una nang gitaho sa PHIVOLCS ang dugang pagsaka sa kalihokan sa bulkan nga naglakip sa giingong pagsaka sa pressure sulod sa bulkan nga posibleng makamugna og laing pagbuto ug mas grabeng paghubag sa dagkong bahin sa bulkan.
Sumala sa PHIVOLCS, kining tanan nagpakita sa posibleng bag-ong pagbuto sa Kanlaon sama sa una niadtong Disyembre 9, 2024.
