Ipatuman sa Department of Trade and Industry (DTI) ang mga proactive nga lakang aron matubag ang posibleng epekto sa gisugyot nga universal tariffs ni US President Donald Trump, nga mahimong hulga sa export sector sa nasud.
Gipasiugda ni DTI Secretary Cristina Roque nga ang US usa sa mga nag-unang trading partner sa Pilipinas diin ang mga taripa mahimong makaapekto sa nagkalain-laing klase sa mga produkto nga gi-eksport sa Pilipinas.
Aron matubag kini, ang DTI miingon nga personal sila nga makigtambayayong sa administrasyon ni Trump aron makonsiderar ang mga solusyon nga mahimong “mutual beneficial.”
Usa sa mga plano nga gikonsiderar sa DTI mao ang posibilidad sa mga preferential trade agreements, nga giingon sa ahensya nga makabenepisyo sa ekonomiya sa Pilipinas ug Estados Unidos.
Basi sa datus gikan sa Philippine Statistics Authority (PSA), niadtong 2024 kay ang Pilipinas nagpabilin nga nag-unang nasud nga nag-eksport sa mga produkto ngadto sa Estados Unidos.
Diin moabot sa $12.12 bilyon, diin lakip sa mga nag-unang produkto nga gi-eksport sa Pilipinas ngadto sa US mao ang mga semiconductor device, automobile parts, electric machinery, textiles ug garments, ug mga processed food and beverages.
Kahinumduman nga gipahibalo ni Trump ang pagpatuman sa 10% nga taripa sa tanang produkto nga gi-import gikan sa ubang kanasuran paingon sa US.
Ang White House bag-o lang usab nagpahibalo sa 25% nga taripa sa mga import gikan sa Canada ug Mexico isip bahin sa mga lakang ni Trump aron mapugngan ang paglalin ug pagpayuhot sa Drogas, apan kini nga mga taripa gi-postpone human ang mga lider sa tulo ka mga nasud miuyon nga ipadayon ang 30 ka adlaw nga paghunong.
