LAPU-LAPU CITY- Naluwas sa mga awtoridad ang duha ka menor-de-edad nga mga dalagita gikan sa kustodiya sa ilang inahan human kini na biktima sa “human trafficking” tungod pahubuon sa camera ug ibaligya ang mga hulagway online niadtong Miyerkules, Pebrero 13, 2025 sa isla sa Olango sa Dakbayan sa Lapu-Lapu.
Ang mga biktima kinsa ang mga pangalan kay gitago alang sa ilang proteksyon kay nagpangidad ug 13 ug 15 anyos nga narescue sa usa ka balay sa Barangay Sta. Rosa, Olango Island diin ilang 33-anyos nga inahan nagtrabaho isip tigluto og cake (baker).
Na-rescue kini sa mga sakop sa Lapu-Lapu City Police, Women and Children Protection Center Visayas Field Unit ug uban pang tinugyanan sa balaod.
Nasikop ang inahan pinaagi sa undercover entrapment operation sa mga kapulisan nga adunay warrant gikan sa korte.
Matod pa ni Police LtCol Christian Torres nga napasaka na ang kaso batok sa inahan, kinsa nangatarungan nga tungod sa ilang kakabus sa panalapi hinungdan nga iyahang gibaligya ang iyahang mga babayeng anak online.
Dugang pa, nga gimonitor na sa mga awtoridad ang mga kalihokan sa inahan sukad pa sa Hulyo 2023 diin ang dinakpan kay maningil og bayad nga P2,000 kada hulagway sa hubo nga lawas sa iyang mga dalagitang anak.
Kasamtangang anaa na karon sa kustodiya sa Center for Women and Children sa Department of Social Welfare and Development Field Office Central Visayas ang mga biktima aron iproseso sa counseling og therapy tungod sa krimen nabuhat sa ilaha.
Kasong kalapasan sa Republic Act 11862 o ang Expanded Anti-Trafficking in Person Act of 2022 ang atubangon sa inahan tungod sa binuhatan.
