TOLEDO CITY,CEBU- Nag-atubang karon og kasong murder ang duha ka pulis sa Toledo City tungod sa giingong pagkulata hangtod sa kamatayon sa 59-anyos nga mendicant (libud-suroy) niadtong Agosto 2024.
Nipasaka usab ang National Bureau of Investigation in Central Visayas (NBI-7) og administrative complaints sa mga pulis nga nanghimakak sa mga pasangil nga gibato kanila.
Gitino ni NBI-Central Visayas director Atty. Renan Oliva, nga naggikan ang reklamo sa usa ka Cristita Rosento Mahinay, tungod sa kamatayon sa iyahang igsoon nga si Eliseo Pañares Rosento.
Ang biktima gideklarar nga dead on arrival sa Toledo City District Hospital niadtong Agosto 26, 2024 sa gabii.
Sa Death Certificate niini, nakita nga ang hinungdan sa kamatayon kay INTRACRANIAL HEMORRHAGE ug TRAUMATIC BRAIN INJURY.
Sa imbestigasyon, nasayran nga mga alas 6:45 sa gabii niadtong Agosto 26, 2024, duha (2) ka polis sa Toledo City Police Office ang nakit-an nga nikulata sa usa ka lalaki, sulod sa ilang patrol car, usa ka Mitsubishi Montero, duol sa Toledo City Catholic Cemetery, Poblacion, Toledo City, Cebu.
Ang mga pagkulata nasaksihan sa daghang mga tawo apan kadaghanan kanila nahadlok usab.
Hinungdan, nga nibiya sa lugar ang maong mga polis sakay sa ilang patrol car ang maong biktima.
Sa mga alas 7:30 sa gabii sa sama nga adlaw, giparada sa maong mga polis ang ilang patrol car atubangan sa FERC Fuels gas station, Poblacion Toledo City, Cebu, diin ang duha (2) ka polis nagpuli-puli sa pagkulata sa samang biktima.
Ang security guard nga nag-duty sa gasolinahan nakakita sa pagkulata ug nakadungog og singgit sa kasakit sa biktima hangtod nga nahilom kini mga alas 8:00 sa gabii niadtong Agosto 26, 2024 ug wala madugay human niana nakita ang usa ka lawas sa usa ka lalaki nga nahulog gikan sa likod nga bahin sa drayber sa patrol car.
Dali nga giila sa security guard ang maong mga polis, nga sila si Patrolman RAYMOND MANIPIS ug PMSG SEPJANREY ESPARES RODA, tungod kay sagad nilang iparada ang ilang sakyanan sa nahisgutang lugar atol sa ilang naandang patrol duty.
Ang maong mga polis nanawag og back up ug dihang niabot ang usa ka SWAT team, ilang gipasabot nga nahulog ang biktima ug naigo ang ulo niini sa semento.
Gikuhaan usab og habig sa NBI-7 ang duha ka mga Pulis og hugot nila nga gipanghimakak ang naasoy nga panghitabo, ning kasamtangan nag duty gihapon ang duha sa naasoy nga Station.
