CEBU – Gikasubo sa Mactan Cebu International Airport Authority (MCIAA) ang epekto sa pag-divert sa mga inbound international flights sa Mactan-Cebu International Airport ngadto sa Ninoy Aquino International Airport (NAIA).
Segon kang MCIAA OIC General Manager Atty. Glenn Napuli nga dili lang ang mga inbound international travelers ug ang mga Returning Overseas Filipino Workers (ROFWs) ug Overseas Filipinos, ang maapektuhan sa diversion sa mga flights kundi apil na ang mga OFWs nga mogawas sa nasod nga mismo sa Cebu ang departure area.
Sa record sa MCIAA, anaa sa 600 ngadto sa 900 ka mga international flights ang moabot sa MCIA matag adlaw diin sakay niini ang mga OFWs ug ROFs. Lakip sa mga flights nga apektado mao ang gikan sa mga lugar nga Doha, Qatar; Singapore; Los Angeles California, USA; ug Dubai.
Kahinunduman nga niluwat ug kamanduan ang Malakanyang nga i-divert ang tanang mga inbound international flights sa Cebu paingon sa NAIA sa
Mayo 29 ngadto na sa Hunyo singko ning kasamtangang tuig.
Samtang gimando usab niini ang pagsunod sa kasamtangang mandato sa IATF sa mga testing ug quarantine protocols batok sa COVID-19 diin i-quarantine ang mga international travelers sa napulo ka adlaw ug i-swab test kini human sa pito ka adlaw anha pa makauli ug ipadayon ang laing upat ka adlaw nga quarantine sa ilang final destination.
Sukwahi ang maong palisiya sa kasamtangang gipatuman sa Cebu Provincial Government alang sa mga returning OFWs ug ROFs diin pag-abot niini sa airport, ipaubos dayon sa swab test una i-quarantine.
Sa oras nga magnegatibo ang resulta, mamahimo na kini nga makauli sa ilang balay ug didto na ipadayon ang pag-quarantine ug mopaubos gihapon sa swab testing human sa ika-pito ka adlaw sukad sa pag-abot niini sa nasod.
