Nikanaog na sa iyang pwesto isip Executive Director si Herbert Matienzo sa Philippine Contractors Accreditation Board (PCAB).
Mao kini ang gikompirmar ni Department of Trade and Industry (DTI) Secretary Cristina Roque, nga nagkanayon nga si Matienzo ni-resign, gahapong adlawa Setyembre 3.
Kahinumdoman nga ang DTI nag-umol ug fact-finding team aron imbestigahan ang mga alegasyon sa conflict of interest, iregularidad sa accreditation, ug posibleng pag-abuso sa awtoridad nga nakahatag og kabalaka bahin sa integridad sa operasyon sa Board.
Sa sayo pa miingon si Roque nga ang departamento mohimo og hingpit nga pagrepaso sa pagpahigayon sa mga board members ug opisyal sa PCAB ug morekomendar og aksyon ngadto kang Presidente Ferdinand “Bongbong” Marcos Jr., lakip na ang posibleng pagpatangtang kanila.
Gibutang ang Construction Industry Authority of the Philippines (CIAP) ug PCAB ubos sa direktang pagdumala sa DTI aron pagpalig-on sa pagdumala ug pagsiguro sa integridad, ingon man ang transparency sa mga ahensya nga nalambigit sa pagpalambo sa imprastraktura.
