Cebu City – Mukabat na sa 1.8 million pesos ang reward money alang sa makatumbok sa gikahimutangan sa mga suspek sa pagpatay kang Christine Silawan kinsang napalgan na lamang sa usa ka bakanteng lote sa Brgy Bangkal dakbayan sa Lapulapu. Kini human nga mitanyag og P1,000,000 nga reward money ang lokal nga kagamhanan sa syudad sa Lapulapu.
Nasayran nga una nang gibutyag ni Police Sr Supt. Limuel Obon , ang city director sa LLCPO nga ang Police Advisory Council sa PRO7 ang mitanyag og P 100,000 samtang laing P 500,000 usab ang gitanyag sa usa ka langyaw nga taga Leyte alang sa makatudlo sa gikahimutangan sa mga suspek aron nga kini sila ang masikop.
Ang probinsya sa Sugbo mihatag usab og P 200,000 .
Matud ni Mayor Paz nga ang tumong sa pagpagawas sa maong kantidad isip reward money aron nga mapaspasan ang pagsulbad sa kaso ingon man ang dinalian nga pagsikop sa mga responsable sa gihulagway nga usa ka niluog nga krimen.
Samtang si Obon mitug-an nga duna na silay gisundan nga suspek pinaagi usab sa kuha sa cctv diin makita nga nisakay og motorsiklo ang biktima kuyug ang usa ka lalaki.
Nasayran nga nakadawat og kamanduan ang Lapulapu City Police Office gikan sa Malacanang alang sa pag prioritize ug pagsulbad sa kaso sa labing dali nga panahon.
