Frontliner sa Sugbo nihangyo sa publiko nga likayan ang diskriminasyon ngadto sa mga kauban niini

CEBU CITY — Emosyunal nga nipadayag ang usa ka chief nurse atol sa pakighinabi sa Bombo Radyo Cebu human niini gisaysay ang pipila ka mga diskriminasyon nga nasita sa ilang mga kaubanang frontliners.

Segon sa frontliner nga si Michelle Bathan Yu, Chief nurse sa usa sa mga pribadong tambalanan sa dakbayan, adunay nurse nga wala na matod pa gipagawas sa landlord sa gipuy-an niini nga balay.

Samtang aduna usa’y matod pa bana sa ilang nurse nga gikulata gumikan kay naghaturan kini sa iyang asawa nga usa ka frontliner.

Subay sa maong sitwasyon, nihimo og mga alternatibo ang pamunu-an sa balay tambalanan nga malikay sa disgrasya og diskriminasyon ang ilang mga ginsakupan.

Nanawagan usab kini sa publiko nga dili sila i-discriminate tungod kay ang pakigbatok sa coronavirus disease 2019 dili lang away sa mga frontliners kundi sa tanan.

Gihimug-atan usab niini nga anaa ang mga frontliners aron moserbisyo sa katawhan ilabi na ning panahon sa krisis.

Matod pa niini, unsaon sila makahatag og serbisyo kung ang mismong katawhan ang mo-discriminate kanila.

Matod ni Yu nga iyang nasabtan ang kahadlok sa uban kalabot sa sitwasyon apan gikinahanglan usab sa mga frontliners ang motivation alang sa ilang trabaho sanglit sila usab matod pa naglisod og adunay kahadlok sa maong pandemic.