Taliwala sa mga ilegal nga kalihokan nga naglambigit sa Philippine Offshore Gaming Operators (POGOs), si Justice Secretary Jesus Crispin Remulla miinsister niadtong Domingo, Hunyo 9, nga ilang gihangyo ang mga langyaw sa nasud nga motuman sa mga balaod sa Pilipinas o kon dili, sila mag-atubang og bug-at nga legal nga silot.
Gipagawas ni Remulla ang pasidaan human sa pag-raid sa POGO hub sa Porac, Pampanga diin nadiskubrehan sa mga awtoridad ang ebidensya sa torture ug kidnapping.
Gimanduan sa Justice Secretary ang National Bureau of Investigation (NBI) ug Bureau of Immigration (BI) nga manguna sa kaso, pasakaan og kaso kon gikinahanglan, ug i-deport dayon ang mga mapamatud-an nga nakalapas sa balaod sa imigrasyon.
Matod pa ni Remulla, welcome ang mga langyaw nga mopuyo sa nasud ug mahimo nila kining itratar nga ilang kaugalingong panimalay basta kinasingkasing lang nga mosunod sa mga balaod nga naa niini ug walay kondisyon.
Una nang gikataho nga ang raid niadtong Miyerkules misangpot sa pagkasikop sa 158 ka Chinese, Vietnamese, ug Malaysian nationals. Ang POGO hub gikataho usab nga gipadagan sa Lucky South 99 Outsourcing.
Niingon ang Presidential Anti-Organized Crime Commission (PAOCC) nga ilang gipaabot nga makadakop og kapin sa 1,000 ka tawo.
