PROVINCE OF CEBU- Nanawagan si Cebu Governor Pamela Baricuatro sa mga lokal nga yunit sa gobyerno (LGUs) ug sa pribadong sektor nga palig-onon ang kolaborasyon aron masulbad ang nagkadako nga hagit sa pagdumala sa solid waste sa probinsya.
Sa iyang pakigpulong atol sa forum nga “Cebu’s Waste Dilemma: The Need and the Urgency to Address It”, gipasiugda sa gobernador nga ang problema sa basura nanginahanglan og “whole-of-society approach”, nga gipahigayon sa Ecotech, Lahug, Cebu City, gahapon Pebrero 20, 2026.
Ang maong forum, nga giorganisar sa Provincial Planning and Development Office (PPDO), nagsilbing pre-summit activity alang sa mas dako nga panagtapok sa Marso 9, 2026, diin ang mga eksperto gikan sa Yokohama City, Japan ug Fujian, China magpaambit sa labing maayong mga pamaagi sa pagdumala sa basura.
Sumala sa Provincial Environment and Natural Resources Office (PENRO) head nga si Rodel Bontuyan, bisan pa nga ang tanang LGUs adunay 10 ka tuig nga Solid Waste Management Plans ug ang Cebu adunay kapin sa 10 ka sanitary landfill, lakip na ang karon nahugno nga Binaliw landfill, dako gihapon ang mga kakulangan.
Lakip niini ang kakulang sa kagamitan sa pagkolekta sa basura, dili epektibong pag-segregate sa gigikanan, limitado nga final disposal sites, kakulang sa hanas nga mga personahe, ug ang backlogs sa pipila ka LGUs sa ilahang pagpatuman sa Solid Waste Management-Plans.
Gipasiugda usab ni EMB-7 Regional Director Atty. John Edward T. Ang, ang panginahanglan sa estriktong pagpatuman sa segregation at source, pagpalig-on sa waste diversion programs, ug pagpalambo sa kapasidad sa mga LGU, lakip na ang posibilidad sa waste-to-energy facilities ilabi na sa highly urbanized areas.
Gihatagan og gibug-aton ni Baricuatro nga ang koordinado ug dali nga aksyon maoy yawe sa pagsulbad sa problema.
