CEBU CITY-Gipasigarbo ni Cebu Gov. Gwendolyn Garcia nga karong tuiga, nagkahiusa ang dakbayan ug probinsya sa Sugbo sa kasaulugan sa Sinulog 2020, karong adlawa.
Sa pakighinabi sa Bombo Radyo Cebu kang Cebu Gov. Gwendolyn Garcia, nagkanayon kini nga usa kini ka special charm gumikan kay misayaw usab si Garcia kauban ang Siloy Festival Dancers sa lungsod sa Alcoy.
Una na usab nga giihulagway sa governor nga usa ka ‘dance for hope’ ang iyang pagperform ilabina nga nagkahiusa usab sila ni Cebu City Mayor Edgardo Labella ug ang labing una nga pagbisita ni Presidente Rodrigo Duterte sa Sinulog Festival butang nga wala pa nahitabo sukad sa una.
Nasayran nga nakahatag usab og kapin usa ka milyong boto ang Sugbo alang ni Presidente Duterte.
Nanghinaot ang gobernadora nga malingaw ug malipay ang Sugbuanon sa ilang pagkahiusa niining tuiga.
Samtang,mipaabot usab ug mabolokon ug malipayong mensahe si Cebu City Vice Mayor Mike Rama, alang sa tanan nga musalmot sa Grand Festival. Awhag sa bise mayor nga nga mag-enjoy ug positibo lang karong adlawa.
