PROVINCE OF CEBU-Gisalikway sa Korte Suprema o Supreme Court (SC) ang apela ni Cebu Provincial Governor Gwendolyn Garcia sa pagpugong sa kamandoan nga pabayron siya sa kapin $2.8-milyones nga utang gikan sa banko nga Hongkong Shanghai Banking Corporation Limited (HSBC).
Matod pa sa Korte Suprema nga ang maong legal nga aksyon sa kampo sa gobernadora usa ka petsiyon nga makapalangan sa proseso lamang.
Mao kini ang gilangkoban sa 12-ka pahina nga hukom nga gipakanaog niadto pang Disyembre 2023 apan napublikar lang niadtong Martes Septiyembre 10 nga ang SC nagmando kang Garcia sa pagbayad sa HSBC sa kantidad nga $700,000 isip danyos ug dugang pa nga 12% nga interes ug legal cost.
Gilagdaan ang maong hukom ni Supreme Court Associate Justice Antonio Kho Jr.
Apan sa habig sa kampo sa gobernadora pinaagi sa legal counsel niini nga si Atty. Alex O. Avisado Jr. sa Gana Atienza Avisado Law Offices nga matod nila wala pa nila nadawat ang maong kopya sa desisyon.
Dugang pa sa abogado ni Garcia nga wala’y tulobagon nga kaso ang ilang kliyente hangtod nga dili pa pinal ang desisyon sa Korte Suprema.
Kahinumduman nga ang maong kaso nagsugod niadtong tuig 1996 sa dihang si Garcia pinaagi sa iyang gahum isip tag-iya sa patigayong “GGC Enterprises” mihuwam sa kantidad nga $900,000 gikan sa HSBC aron sa pagpalit og transport cargo barge apan napakyas kini sa pagbayad sa installment agreement hinungdan nga nipasaka ug kaso ang banko ug naabot kini sa Regional Trial Court sa Makati, Court of Appeals ug hangtod sa Korte Suprema nga midagan na sa kapin duha ka dekada.
