CEBU CITY — Giklaro ni Cebu Provincial Governor Gwendolyn Garcia himoong usa ka museo ang Provincial Capitol nga nahimutang sa dalan Escario, dakbayan sa Sugbo.
Kini subay na sa nahimong plano ni Garcia nga ibalhin ang mga buhatan sa lehislatibo ug ehekutibo sa provincial government ngadto sa lungsod sa Balamban.
Atol sa virtual press conference sa gobernadora, nagkanayon kini nga wala kini intensyon nga ibalhin ang mismong kapitolyo inay ibalhin lang ang ilang buhatan ngadto sa Balamban, ang bukirang bahin sa lalawigan.
Dugang pa ni Garcia nga kung mahinayon man maong ang pagbalhin, himoong usa ka heritage site ang kasamtangang tugkaran sa Provincial Capitol ug kinahanglan pang mananghid una sa National Historical Commission of the Philippines.
Unang napaglantawan sa gobernadora nga ibalhin sa Balamban ang mga buhatan sa provincial government aron mas accessible kini sa mga konstitwente.
Natukod ang inilang edipisyo sa Cebu Provincial Government niadtong tuig 1938.
