Mahimong i-sekreto sa International Criminal Court (ICC) ang pag-isyu sa warrant of arrest hangtod nga malutsan na ang mga akusado sa giingong crimes against humanity nga nahimo ubos sa war on drugs sa miaging administrasyong Duterte.
Nipasabot si ICC assistant to counsel Maria Kristina Conti nga posibleng ipahibalo sa ICC nga ilang nadakpan ang mga wanted sa Pilipinas ug sa dihang paingon na sila sa The Hague diin nagbasi ang international tribunal.
Sa pagkakaron, si Conti dili sigurado kung ang maong warrant maipagawas karong Nobyembre o sa sayong bahin sa 2025.
Apan, gitumbok ni Conti nga ang panawagan karon sa ICC alang sa dugang mga saksi sa imbestigasyon sa mga krimen batok sa katawhan nagpakita nga ang pagpangita sa mga ebidensiya kay gitutukan.
Una sa tanan, basi sa dokumento sa ICC, gitumbok nga mga suspek si kanhi Presidente Rodrigo Duterte, kanhi PNP chief ug Senador Ronald dela Rosa, kanhi PNP officials Oscar Albayalde, Edilberto Leonardo, Eleazar Mata, ug kanhi Criminal Investigation and Detection Group chief ug kasamtangang Northern Luzon commander, Maj. Gen. Romeo Caramat Jr.
Samtang, ang kasamtangang administrasyon kaniadto nibarog sa ilang baruganan nga dili mokooperar ang PH sa imbestigasyon sa ICC tungod kay sukad pa niadtong 2019 nibuhi na ang atong nasud.
Sa datus sa gobyerno, gibanabana nga 6,000 ka mga drug personalities ang napatay sa duguong drug war, apan gibanabana sa human rights groups nga mokabat sa 30,000 ang napatay atol sa kataas sa kampanya batok sa ilegal nga drugas ubos ni kanhi PRRD.
