Padayong nagkasaka ang ihap sa mga nakabsan sa kinabuhi diri sa Sugbo nunot sa epekto sa paglabay sa Bagyong Tino.
Sumala pa sa taho sa Kapitolyo pinaagi ni Cebu Provincial Information Office (PIO) Head Ainjeliz Dela Torre Orong atol sa pakighinabi niini sa mga tigbalita niadtong Martes, Nobyembre 4 nga sa nahipos nila nga datos gikan sa Cebu Provincial Disaster Risk Reduction and Management Office (PDRRMO) kay aduna nay natalang 39 ka mga nangamatay tungod sa katalagman.
Sa maong ihap, ang lungsod sa Compostela kay maoy pinakataas nga ihap sa namatay sa 15 nga gisundan sa dakbayan sa Mandaue sa 9 dayon sa dakbayan sa Danao sa 8 ug sa dakbayan sa Talisay sa 7.
Dugang pa sa opisyal nga hinay ang ilang linya sa komunikasyon tungod na sa nabaldang suplay sa telekomunikasyon ug kuryente sa probinsya tungod sa nangaguba nga mga imprastruktura tungod sa bagyo.
Ingon man nga ang mga apektadong lokalidad pinaagi sa ilang mga opisyal kay nakigkoordinar na sa Kapitolyo aron sa paghatag og update ug tukmang kahimtang sa ilang sitwasyon.
Sa samang bahin, ang Cebu City Disaster Risk Reduction and Management Office (CCDRRMO) mitaho sa ihap nga 9 ang patay gikan sa mga barangay sa Bacayan, Cogon Pardo, Guadalupe, Kalunasan, Población Pardo, Sapangdaku, ug Talamban diin ang mga biktima nagpangedaron gikan sa uno-anyos ngadto sa 60-anyos.
