CEBU CITY-Sakit apan wala na matud pay laing mahimo kundi dawaton ang nahitabo.
Kini ang pamahayag ni Romhil Bagiuo anak sa magti-ayon ug igsoon sa usa sa namatay sa Guimaras- Iloilo Sea Tragedy.
Kini nunot na usab sa pag-abot sa 7 ka mga patay nga lawas sa Janson ug Guimaras family sa Brgy. Ermita kagahapon gikan sa Iloilo City.
Sakay sa C-130 plane, hingpit na nga nahatud ang mga lawas sa mga biktima sa nalunod nga motorbanca.
Gisugat kini sa lanog nga bakho ug hilak sa dihang gipahimutang na sa Gymnasium sa naasoy nga baranggay.Duha lamang sa mga lungon ang naablihan tungod kay ang uban naa na sa state of decomposition.
Matud usab ni Romhil nga sa karon ila lang usang tutukan ang pagpalubong dayon niini ug ayha na planohan ang sunod nga lakang subay sa maong disgrasya. Boot nalang matud pa nga ipalubong dayon sa pamilya ang mga nangamatay para dili na sila mas masakitan pa sanglit mas sakit kung kanunay sila nga magsud-ong niini.
Samtang sa habig usab sa Janson Family, nagpasalamat kini sa pinansyal nga tabang nga gihimo sa siyudad para sa pagpahiluna sa ilang mga kabanay nga namatay.
Matud ni Jason Janson nga makigmeeting pa usab karong adlawa kanila si Brgy. Ermita Mark Miral para sa sunod nga lakang ug hisgutan usab ang adlaw sa lubong sa mga namatay.
Human mapahimutang sa kapahulayan ang ilang mga kabanay nga mitaliwan ayha na matud pa sila mudesisyon sa ilang gusto nga mahitabo.
