Gibutyag ni House Deputy Majority Leader Francisco Paolo Ortega ang mga pangalan sa pito pa nga giingong nakadawat sa confidential funds gikan sa Office of Vice President Sara Duterte, lakip niini ang gihinganlan nga “Jay Kamote” ug “Miggy Mango.”
Sa usa ka pamahayag, ang kongresista sa La Union nagkanayon nga ang uban pa sa mga bag-ong pangalan mao sila si Dodong Alcala, Dodong Bina, Dodong Bunal, Dodong Darong, ug Dodong S. Barok.
Matod ni Ortega nga mahimo kining gamiton sa pagpalig-on sa impeachment case batok sa Bise Presidente.
Ang Departamento sa Edukasyon, nga gipangulohan ni Duterte niadtong panahona, ug ang Opisina sa Bise Presidente misumiter og mga dokumento nga adunay sayop nga mga petsa, mga pirma nga walay mga pangalan sa mga mipirma, ug dili mabasa nga mga pangalan sa mga mipirma aron hatagan og katarungan ang paggasto sa mga confidential funds niini sa 2022 ug 2023.
Ingon man si “Mary Grace Piattos,” kinsa walay record sa Philippine Statistics Authority.
Sayo ning buwana, tulo pa ka pangalan sa gituohang mga benepisyaryo ang gibutyag, lakip ang “Xiaome Ocho,” nga susama sa pangalan sa usa ka modelo sa mobile phone.
Samtang, si Senate President Francis “Chiz” Escudero miingon nga ang desisyon sa impeachment trial ni Duterte mahimong mahatag na sa Oktubre ning tuiga.
